Molarga paingon sa Rome, Italy si Cebu Archbishop Alberto “Abet” Uy aron opisyal nga dawaton ang pallium gikan kang Pope Leo XIV sa usa ka seremonyas didto sa St. Peter’s Basilica karong Hunyo 29, 2026.
Subay sa gipagawas nga pamahayag sa arsobispo, ang maong pallium usa ka sagradong vestment nga gisuot sa Santo Papa ug sa mga metropolitan archbishop isip simbolo sa pagkahimong “Good Shepherd” ug sa ilang pakig-alayon sa Santo Papa ug sa tibuok Simbahang Katolika.
Pahigayonon ang maong seremonyas dungan sa kapistahan sa Solemnity nila ni St. Peter ug St. Paul, diin tambungan usab kini sa uban pang mga bag-ong natudlong metropolitan archbishop gikan sa nagkalain-laing nasod.
Tungod niini, nangayo og pag-ampo ang arsobispo alang sa iyang luwas nga pagbiyahe uban sa iyang mga kaubanan samtang ilang gituman ang ilang katungdanan isip mga magbalantay sa Simbahan.
Human sa seremonyas, magpabilin pa og pipila ka adlaw ang arsobispo sa Europa alang sa usa ka pilgrimage sa nagkalain-laing sagradong dapit ug siya misaad nga iapil sa iyang mga pag-ampo ang tibuok niyang nasakupan.
Si Archbishop Uy, kinsa kanhi obispo sa Tagbilaran, Bohol, ang milingkod isip bag-ong pangulo sa Archdiocese of Cebu hulip kang Archbishop Jose Palma nga miretiro na sa pangedaron nga 75. Siya ang ikalimang arsobispo sa Sugbo, nga nagkupot sa kapin sa 170 ka mga parokya.
