MANDAUE CITY, CEBU- Giila ni Police Captain Ricxmar Von R. Buletic, Officer-in-Charge sa Police Station 5 (PS5) sa Mandaue City, nga dakong responsibilidad alang kaniya ang iyang bag-ong tahas isip lider sa maong police station, ilabi na sa pagpanalipod sa kalinaw ug kahusay sa ilang sakop nga area.
Sa iyang pakighinabi sa Bombo Radyo Cebu, matod pa ni Buletic nga usa sa iyang mga nag-una nga prayoridad mao ang pagpalig-on sa disiplina sa kapulisan, pagpaayo sa kapaspason sa police response ug mas hugot nga pagbantay batok sa kriminalidad aron masiguro ang kaluwasan sa katawhan.
Gipadayag usab niya nga aktibo ang PS5 atol sa pag-igo sa Bagyong Tino, diin mitabang ang kapulisan sa mga rescue operations, paghatag og seguridad, ug relief distribution.
Isip kabahin sa ilang community outreach programs, nagpahigayon usab ang PS5 og ‘Pamaskong Handog’ alang sa mga kabataang biktima sa bagyo.
Pinaagi niini, gipakita sa kapulisan nga sila kauban sa komunidad dili lamang sa pagpatuman sa balaod, kundili usab sa paghatag og paglaum ug pag-amuma, ilabi na sa mga kabatan-onan.
Sa katapusan, mihangyo si Captain Buletic sa kooperasyon sa katawhan aron malikayan ang krimen ug mapadayon ang kalinaw sa komunidad.
Gisiguro usab niya nga abli ug andam kanunay ang Police Station 5 sa pag-alagad, pagpaminaw, ug pagpanalipod sa tanang Mandauehanon.
