Gikatahong daghang tawo ang gituohang namatay ug kapin sa 100 ang nasamdan human miulbo ang sunog sa usa ka bar sa ski resort sa Crans-Montana, Swiss Alps, Switzerland, atol sa pagsugat sa Bag-ong Tuig.
Sumala sa Cantonal Police sa Valais, usa ka kusog nga pagbuto ang nahitabo tungod sa sunog, apan walay timailhan sa terorismo sa lugar.
Matud sa taho nga daghan sa mga nasamdan ang nakaangkon og grabe nga paso.
Hinungdan nga napugos ang mga awtoridad sa pagpadala og 10 ka helikopter, 40 ka ambulansya, ug 150 ka rescue personnel aron moresponde sa makalilisang nga insidente.
Sumala sa report, wala pa matino sa mga awtoridad ang hinungdan sa sunog ug giingon nga ang kusog nga pagbuto wala gipahinabo sa usa ka “explosive device.”
Ingon man nga wala pa gikumpirmar sa mga awtoridad ang impormasyon bahin sa nasyonalidad ug identidad sa mga biktima.
