Napusilan-patay sa pulis ang usa sa duha ka suspek sa pag-atake gamit og granada sa Bisperas sa Bag-ong Tuig sa Matalam, North Cotabato, sa usa ka hot pursuit operation nga gihimo mga alas 8 sa gabii Huwebes, Enero 1, 2025
Ang suspek giila nga si Hammad Ansa, 40 anyos, minyo, ug residente sa Purok 6, Barangay Kilada, Matalam.
Sa usa ka interbyu sa Bombo Radyo Gensan, gikumpirma ni PBrig. Gen. Arnold Ardiente, Regional Director sa Police Regional Office 12, nga ang suspek giingong misukol, hinungdan nga napugos ang mga pulis sa pagbalos.
Padayon pa ang mga operasyon sa kapulisan sa paggukod sa ikaduhang suspek nga nalambigit sa maong insidente.
Nasayran nga ang duha ka suspek nagsakay og motorsiklo maoy nag-target sa mga residente nga nagsaulog sa Bag-ong Tuig, nga miresulta sa pagkaangol sa 22 ka tawo, lakip na ang siyam ka menor de edad.
Ang inisyal nga imbestigasyon nagpakita nga posibleng may kalabutan ang pag-atake sa kampanya sa pulis batok sa ilegal nga droga sa maong munisipyo.
Dugang pa, nga ang Barangay Kilada nalista isip usa sa mga giila nga tagoanan sa mga sindikato sa droga nga naglihok sa maong lugar.
