Gipasabot ni Juluis “Tatay Bom” Canoy, usa ka kanhi miyembro sa New People’s Army (NPA) nga ang pagsikop sa mga kasundalohan sa 24 anyos nga Fil-am nga si Chantal Anicoche matawag nga ‘rescue’ kay wala man kini nakuhaan og armas, apan kung nakuhaan og armas diha na nga matawag kini nga hingpit nga nadakop.
Mao kini ang gikabutyag ni Tatay Bom atol sa ekslusibong pagkab-ot sa Bombo Radyo Cebu Newsteam kaniya, diin iyahang gidugang nga gitoohang nakadagan o nakatago kini atol sa engkwentro hinungdan nga matawag kinig narescue sa mga sakop sa kasundalohan.
Panglangtaw usab niya nga maayo kini pagkaatiman susama sa iyang naagian kaniadto nga sa dihang narescue sila, diin wala sila makatilaw o ba kaha nakasuway og sakit, hinuon giatiman pa sila, ug gipakaon.
Alang kang Tatay Bom, nga mga pasangil lang nga si Anicoche usa sa mga miyembro nga kasamtangang nagtuon sa mga Mangyan, kay matod niya, sa tinud-anay nga sitwasyon basta malakip na sa NPA nasayran na kung unsa ang padulngan.
Apan ligdong ang iyang pagtuo nga magpabiling ilimod ang kamatuoran ilabi na nga daghang pamaagi sa pagpang-recruit labi na sa mga estiyudante.
Gani, iyahang naasoy nga sa pirmerong bahin sa recruitment, 3 ka buwan kining i-expose sa partikular nga luna, ug sa dihang masuhito na kini, mao na kini ang magdumala o mangulo alang sa mga illiterate nga mga indibidawal sa maong dapit.
