Nipadayag og suporta ang Regional Director sa Commission on Human Rights-Central Visayas nga magpahigayon og lawm nga imbistigasyon sa bag-ohay nga nahitabong engkwentro sa Toboso, Negros Occidental diin adunay 19 ka indibidwal ang namatay.
Kini ang gipaambit ni Atty. Arvin Odron atol sa pakighinabi sa Bombo Newsteam aron sa pagkuha sa habig ug pagsuta kon aduna ba’y nalapas nga tawhanong katungod nunot sa mga pangangkon ug pagdeklarar sa Armed Forces of the Philippines nga legitimate ang ilang operasyon ug ang 19 ka mga nangamatay puros gayud mga miyembro sa NPA.
Busa, matud ni Atty. Odron nga aron mahatagan og katin-awan ang publiko kabahin sa tinuod nga panghitabo, angayan lang nga ihatag ang maong lakang alang sa “closure” sa maong kaso.
Ingon man nga kon gani tinuod ang mga pangangkon nga miyembro sa NPA ang mga nakalas, gihimug-atan niini nga balido ang engkwentro gumikan gimando ngadto sa mga militar ug kabahin sa ilang operasyon nga i-clear ang mga terorista sa nasud hilabina kon adunay mga sibilyan nga madamay.
Sa pikas bahin, gisaway sa usa ka kanhi miyembro sa NPA ang mga giingong aktibista ug researcher nga namatay sa engkwentro nga igo lang mibuhat sa ilang propesyonal nga buluhaton sama sa research, immersion, ug community engagement ug wala kini nagpasabot nga sila nalambigit sa armadong grupo.
Apan, sa giasoy ni Julieto “Tatay Bom” Canoy, kanhi NPA nga karaan na ang maong rason sulod sa 57 ka tuig na ang milabay hinungdan nga dili kini angay nga tuohan.
Inay giawhag niini ang mga kabatan-onan nga dili magpadala sa mga pasalig ug pagpanglimbong sa mga teroristang grupo gumikan mahimubo lang ang ilang kiabuhi.
Ingon man nga gi-awhag usab ni Canoy ang mga ginikanan nga gihaylo usab sa gitawag nga “dole out” o ang paghatag og mga butang o pasalig isip tanyag aron dili na makabalibad ang mga ginikanan sa panahon nga i-recruit na ang ilang mga anak.
