Magpatuman ang Cebu City Transportation Office (CCTO) og close-open traffic scheme sa kadalanan sa dakbayan sa Sugbo nga maagian sa routa sa Walk with Mary ugmang adlawa sa Huwebes, Enero 15, 2026.
Kini ang gikumpirmar ni CCTO Head Raquel Arce atol sa eksklusibong pakighinaib sa Bombo Radyo Cebu News Team kaniya diin sumala pa nga bisan paman sa kahago nga nasinati sa mga sakop sa tigpatuman sa lagda sa trapiko sa dakbayan kay masugakod nila kini alang sa hapsay nga mga kalihukan sa kapistahan sa Sr. Sto. Niño karong tuiga.
Samtang ang detalye niini sa Traslacion kay magdeploy ang CCTO og motorized enforcers nga muuban sa Traslacion hangtod sa utlanan sa dakbayan sa Sugbo ug Mandaue sa dili pa itugyan ang traffic details ngadto sa awtoridad sa kasikbit nga syudad.
Ang CCTO kay magdeploy sa 80 ka mga personnel niini takna alas 2 pa lang sa kadlawn gikan sa Guadalupe Church hangtod na sa ilang pagpahigayon sa Traslacion. Gipasalig niini nga mamahimong hapsay ang Dagan sa trapiko sa kadalanan sa syudad subay sa pagselebrar sa mga kalihokaan sa kapistahan sa Sr. Sto. Niño de Cebu.
Samtang sa pikas bahin, mihatag og katin-awan si Arce kabahin sa mibuto nga isyu sa social media diin na-clampan ang sakyanan ni Cebu City Councilor Winston Pepito sa nakalabayng adlaw sa Martes, Enero 13 samtang nagtambog sa sesyon ang konsehal sa City Hall.
Sumala pa ni Arce nga ang dagan sa panghitabo kay ang gamayng pagka walay pagsinabtanay sa mga shifting personnel niini nga natahasan sa deployment sa Cebu City Hall Square diin ang matag konsehal sa dakbayan kay gitugyanan og special vehicle sticker pass aron maka-drop off sa pasahero ug temporaryong pag-park sa lugar diin naabot kini sa punto nga ang relibo nga CCTO personnel midesider mu-clamp sa sakyanan kay sa pakigsuta nga gitagana ang dapit par sa mga emergency vehicles.
Gani karon nangayo og paghangyo si Arce sa mga konsehal nga kung adunay kalihokan silang tambongan sa City Hall kay ipahibalo sa naka-duty nga CCTO personnel ang ilang katuyoan hangtod na sa mga murelibong sakop nila aron malikayan ang laing wala ka pagsinabtanay.
