Miabot sa kapin 216,000 ka mga deboto ang mitambong sa tinuig nga Penitential Walk with Mary kaganihang sayong buntag rong Huwebes, Enero 15, 2026.
Kini kabahin sa dagkong relihiyosong aktibidad sa ika-461 nga kapistahan sa Sr. Sto. Niño de Cebu diin alas 2:30 sa kadlawn pa lang kay migawas na ang imahen ni Nuestra Señora de Guadalupe of Cebu gikan sa Archdiocesan Shrine and Parish of Our Lady of Guadalupe padulong sa Fuente Osmeña Circle. Pagtakna alas 4 sa buntag nagsugod ang pagbaktas padulong sa Basilica Minore del Sto. Niño diin giduyogan kini sa mga opisyales sa dakbayan sa Sugbo, mga religious groups, ug ordinaryong deboto.
Matud sa Cebu City Police Office (CCPO) sa pakighinabi sa Bombo Radyo Cebu News Team kang Spokesperson Police LtCol. Jose Los Baños nga nahimong malinawn ang nahimong kalihukan sa kapin 2 kilometros nga baklay sa Birhen sa Guadalupe.
Base sa inisyal nga sumada sa mga Cebu City Disaster Risk Reduction and Management Office (CCDRRMO) nga adunay kapin 216,000 ang mitambong sa kalihukan diin 152,000 ang mibaklay sa kadalan sa Osmeña Blvd. samtang 64,000 ang nag-atang sa Basilica Minore de Sto. Niño nga mas ubos kun itandi sa ihap niadtong nakalabayng tuig sa kapin 300,000 nga partisipante.
Ang mga kapulisan kay kanunayng nagpahimangno sa kooperasyon gikan sa publiko aron mapabilin ang kahapsay sa mga kalihukan sa Fiesta Señor ug Sinulog karong tuiga.
