Giklaro ni Atty. Ferdinand Topacio, ang legal counsel ni kanhi Negros Oriental 3rd District Representative Arnolfo “Arnie” Teves Jr., nga dili gihapon makagawas sa prisohan si Teves tungod sa duha ka nag-ung-ong nga kaso sa kanhi magbabalaod./
Gipunting nga ang duha ka kaso may kalabutan sa giatubang ni Teves isip giingong mastermind sa pagpatay sa kanhi Gobernador sa Negros Oriental nga si Roel Degamo niadtong 2023.
Kaniadto si Teves gi-abswelto sa korte sa giingong pagpatay ni Miguel Lopez Dungog, nga usa ka kanhi miyembro sa provincial board niadtong 2019.
Sumala ni Topacio, base sa desisyon sa Manila Regional Trial Court Branch 15, ang “demurrer to evidence” sa kanhi kongresista gi-aprobahan.
Giingon usab sa korte nga ang prosekusyon napakyas sa pag-establisar og “prima facie” nga kaso, mao nga gi-abswelto si Teves.
Bisan pa, sumala sa Department of Justice (DOJ), wala pa sila makadawat og opisyal nga mando gikan sa korte.
Gipasalig usab sa DOJ nga gamiton nila ang tanang legal nga remedyo sa higayon nga madawat sa prosecution panel ang opisyal nga kopya gikan sa korte.
Samtang, masaligon usab si Topacio nga ang duha ka kaso batok sa kanhi kongresista mabasura tungod kay nagtuo siya nga kini daw hinimo-himo lang sa gobyerno.
