Gitubag sa abogado sa kontrobersyal nga negosyanteng si Charlie ‘Atong’ Ang ang mga pasangil kalabot sa giingong pag-areglo o pagbayad sa pamilya sa mga biktima.
Mibarog ang depensa ni Atty. Caroline Cruz nga bakak ug walay legal nga basehan ang reklamo nga gisang-at batok kaniya.
Kahinumduman nga gipasakaan og reklamong obstruction of justice si Cruz tungod sa giingong paghatag og kwarta ngadto sa pamilya sa mga “missing sabungeros” baylo sa ilang pag-atras o dili pagtambong sa mga pagdungog (hearing) sa kaso sa korte.
Tungod niini, pormal nga gihangyo sa kampo ni Cruz ngadto sa Department of Justice (DOJ) nga ibasura ang maong reklamo.
Gipasiugda sa iyang legal counsel nga si Atty. Isabella Sabio, nga ang iyang kliyente biktima lamang sa malisyoso ug bakak nga mga akusasyon nga gihimo sa mga nagreklamo.
Bisan tuod og giangkon niini nga nakigkita sila sa pipila ka mga pamilya sa mga nawalang sabungero, giklaro ni Sabio nga walay gipangayo nga bisan unsang baylo ang ilang kampo, ug ang gihatag nga kwarta usa lamang ka tiunay nga pinansyal nga tabang.
Dugang pa niya, walay bisan usa ka dokumento o gipirmahang kasabutan nga nagmando og kondisyon sa dihang gi-apod-apod ang maong pinansyal nga ayuda ngadto sa mga pamilya.
