Gikwestiyon ni kanhi House Speaker ug Leyte 1st District Representative Ferdinand Martin Romualdez ang kaangayan sa Office of the Ombudsman sa nagpadayong imbestigasyon batok kaniya, tungod matud pa sa paggamit niini og mga testigo kansang kredibilidad gikuwestiyon kaniadto.
Gitataw ni Romualdez nga ang iyang gipangayo mao ang patas ug saktong pagtagad ubos sa balaod.
Matod niya, ang Ombudsman nagsalig sa mga saksi nga kaniadto giisip nga dili kasaligan sa maong buhatan ug sa Department of Justice (DOJ).
Bisan og wala niya gihinganlan, giila ni Romualdez ang mga testigo nga gipasakaan og mga kasong cyberlibel ug perjury.
Apil niini ang 18 ka kanhi bodyguard ni kanhi Ako Bicol Party-list Representative ug pugante nga si Zaldy Co.
Bisan pa niini, miinsister si Romualdez nga dili siya moatras sa away ug magpadayon sa pag-atubang sa mga imbestigasyon.
Samtang, gipasalig ni Assistant Ombudsman Mico Clavano nga kasaligan ang ilang ipresentar nga mga testigo ug gisuportahan kini sa lig-ong ebidensya sa ilang mga bank account.
Bisan tuod dunay isyu sa joint affidavit sa 18 ka kanhi bodyguard, napamatud-an nga klaro ug makanunayon ang ilang tagsa-tagsa ka sinumpaang pahayag, ilabi na mahitungod sa giingong paghatod sa salapi o cash delivery nga naglambigit nila ni Zaldy Co ug Martin Romualdez.
