Giduso na sa magtiayon nga sila Alfred Vargas ug Yasmine Vargas ngadto sa Department of Justice (DOJ) ang ilang reklamo human gibasura sa Manila City Prosecutor’s Office ang ilang unang Motion for Reconsideration.
Gisaka sa magtiayon ang kaso may kalabotan sa giingong pagpang-bully sa ilang anak, human magpabilin ang naunang desisyon sa piskalya nga ibasura ang ilang reklamo.
Sa ilang pahayag, giingon nila nga adunay klaro ug makanunayon nga testimonya gikan sa daghang independente nga mga saksi nga personal nakakita sa giingong insidente sa pagpang-bully.
Ilang gipadayag usab nga lakip sa ilang gisumiteng ebidensya ang Psychiatric Evaluation Report gikan sa St. Luke’s Medical Center, nga nagpakita nga ang ilang pito ka tuig nga anak adunay Adjustment Disorder, nga ilang giingong resulta sa trauma ug kahadlok nga nasinati.
Ang reklamo batok nila Rob Sy ug Juvelle Bacosa may kalabotan sa giingong paglapas sa Republic Act No. 7610 o ang Special Protection of Children Against Abuse, Exploitation and Discrimination Act.
Samtang, hugot nga gihimakak ni Rob Sy ang mga akusasyon.
Matud niya, imposible nga nahitabo ang giingong insidente tungod sa presensya sa daghang tawo ug mga security personnel sa maong lugar.
