CEBU CITY- Miluwat si Mayor Nestor Archival sa Dakbayan sa Sugbo og Executive Order (EO) nga nagpatuman sa pagdili sa ilimnong makahubog sulod sa 300-metros nga radius sa ruta sa Sinulog Grand Parade.
Ubos sa EO 051, ang pagdili sa ilimnong makahubog epektibo gikan alas 6 sa buntag hangtod alas 8 sa gabii sa Enero 17, ug ipatuman usab sa Enero 18 sa samang oras.
Matod ni Col. George Ylanan, hepe sa Cebu City Police Office (CCPO), estrikto gyud nga ipatuman ang maong pagdili.
Sumala pa ni Ylanan, magpadala og mga personahe ang kapulisan sa mga establisemento nga namaligya og ilimnong makahubog aron pahibaluon sila bahin sa pagpatuman sa liquor ban.
Dugang pa niya, estrikto usab nga magmonitor ang mga pulis sa mga establisementong komersyal aron masiguro ang hingpit nga pagsunod sa maong mando.
Gipasiugda ni Ylanan nga gituyo ang pagdili sa ilimnong makahubog aron malikayan ang kagubot ug mga insidente nga posibleng mahitabo atol sa kapistahan sa Sinulog.
Iyang gidugang nga upat ka bus ang ipakatap ug gamiton isip temporaryong custodial facility alang sa mga madakpan nga nagmugna og kagubot.
Samtang, liboan ka pulis ang ipakatap atol sa Sinulog, nga bahinon sa 11 ka sektor, matag usa adunay tagsa-tagsa nilang ground commanders.
