Gipahibalo ni US President Donald Trump ang pagmugna og “Board of Peace” alang sa Gaza, nga gituyo aron sa pagdumala sa interim nga administrasyon ug pagtukod pag-usab sa mga naguba nga lugar human sa gubat tali sa Israel ug Hamas.
Ang mga founding member niini naglakip ni US Secretary of State Marco Rubio ug kanhi UK Prime Minister nga si Sir Tony Blair, ingon man ang executive board sa Middle East envoy nga si Steve Witkoff, Jared Kushner, World Bank President Ajay Banga, Marc Rowan, ug US national security adviser nga si Robert Gabriel, uban ni Trump nga nagsilbing chairman sa board.
Gitudlo usab isip representante sa board sa Gaza si kanhi UN Middle East envoy Nickolay Mladenov.
Nasayran usab nga ang naasoy nga board kabahin sa 20-point peace plan ni Trump.
Dugang pa, usa ka International Stabilization Force ang pagapormahon ubos sa pagpangulo ni US Major General Jasper Jeffers aron suportahan ang seguridad ug bansayon ang Palestinian police.
Sa samang higayon, usa ka lahi nga National Committee for the Administration of Gaza, usa ka 15-member nga Palestinian technocratic body nga gipangulohan ni Ali Shaath, ang tukuron aron mangulo sa adlaw-adlaw nga operasyon sa teritoryo.
Angayan nga matikdan nga ang plano sa kalinaw sa US gipatuman niadtong Oktubre sa miaging tuig ug naa na sa ikaduhang hugna niini, nga nagpunting sa pagtukod pag-usab ug demilitarisasyon sa Gaza, lakip ang disarmament sa Hamas.
Bisan pa, ang kasabutan nagpabilin nga huyang tungod kay ang kapintasan natala pa, ug sumala sa United Nations, ang sitwasyon sa kapin sa 2.1 milyon nga mga Palestinian sa Gaza nagpabilin nga grabe.
