Nimando ang mga hurado sa International Criminal Court (ICC) og espesyal nga medical accommodations alang kang kanhi Philippine President Rodrigo Duterte dungan sa pormal nga pagtakda sa upat ka adlaw nga confirmation of charges hearing nga adunay hugot nga limitasyon sa oras aron malikayan ang sobra nga kakapoy sa iyang panglawas.
Sa gipagawas nga mando niadtong Enero 27, 2026, gitakda sa Pre-Trial Chamber I ang mga pagdungog sa Pebrero 23, 24, 26, ug 27. Ubos sa bag-ong patakaran, tulo ka oras lang kada adlaw ang itugot alang sa hearing ug duna kini kada oras nga break aron masiguro ang kaayohan sa kanhi presidente base sa rekomendasyon sa mga medical expert.
Aron maseguro ang patas nga dagan sa hustisya, gihatagan sa Chamber og mas taas nga oras ang kampo sa depensa ni Duterte sa pagpresentar sa ilang mga argumento. Ang prosekusyon gihatagan og kinatibuk-ang tulo ka oras ug tunga alang sa ilang mosyon, samtang ang depensa gihatagan og upat ka oras ug tunga sanglit mao pa kini ang ilang unang higayon nga makaduso og submissions sa merits sa kaso.
Dungan niini, ipahigayon usab sa katapusang sesyon sa Pebrero 27 ang tinuig nga review sa detensyon ni Duterte aron masuta kon angay ba kining ipadayon. Kini subay sa balaod sa ICC nga nagmando og review sa detensyon sa usa ka suspek kausa sa matag tuig human sa iyang unang pagpakita sa korte niadtong Marso 14, 2025.
