Nibalos sa gugma ug suporta si Filipina tennis ace Alex Eala ngadto sa iyang mga supporters pinaagi sa usa ka surprise meet and greet event niadtong Martes sa Rizal Memorial Coliseum.
Gisunggan ni Eala ang fan zone sa Philippine Women’s Open sa Martes sa hapon, samtang ang pagbundak sa ulan maoy nipahunong sa pagsugod sa mga main draw matches. Ang mga fans nga anaa sa venue dako ang kalipay ug kahinam nga makita ang tennis star sa personal ug sa duol, gawas sa panahon sa iyang mga duwa.
Bisan wala pa nagsugod ang fan meet, makita na ang taas nga linya sa mga supporters sa sulod sa Rizal Memorial Coliseum, diin ang matag usa nagdala og tennis ball o mga memorabilia. Malipayong giatubang ni Eala ang matag fan ug gipirmahan ang ilang mga dala, samtang ang uban nakahigayon pa sa paghatag og mubo nga mensahe o pagtimbaya alang sa garbo sa Pilipinas.
