CEBU CITY- Mipaabot sa ilang walay puas nga pasalamat sa Kagamhanang Dakbayan sa Iligan sa Lanao del Norte sa Northern Mindanao human sa pagdalit og tabang sa Cebu City Disaster Response Team sa ilang syudad human sa pag-igo ug pagkuso-kuso sa nakalabayng Bagyong Basyang.
Ang Cebu City Task Force Iligan kay naabot niadtong Dominggo sa buntag, Pebrero 8 nga gilangkuban sa 28 ka miyermbro nga gipangulohan ni City Councilor Dave Tumulak diin dala nila ang radio communication team, heavy equipment, mechanical and electrician teams, water tanker. man lift, ambulance team, ug chainsaw sa ilang clearing and rescue works sa syudad.
Dugang pa nga nagdala sab ang Sugbuanong rescuers ang relief campaign ug clearing operations personnel sa ilang paningkamot nga mapanumbalik ang operasyon sa Iligan.
Gani sa ilang unang adlaw sa Iligan, nagpahigayon dayon ang mga Sugbuanong rescuers sa flushing operation sa sa dagkong kadalanan isip proactive measure nga makapaminus sa road hazards, dalin-as nga kondisyon, ug pagpaminus sa risgo sa posibleng insidente sa kadalanan sa pagsigurong luwas ang mga pedestrians ug motorista.
Giabagan kini sila sa BFP Iligan ug Iligan City Disaster Risk Reduction and Management Office isip pagpakita sa ligdong nga inter-agency cooperation sa disaster response.
