Giyabo sa entrada nga gate sa Block 27 sa North Reclamation Area ang kargang basura sa garbage dump truck nga gikan sa Barangay Mabolo ning dakbayan sa Sugbo niadtong adlawng Huwebes, Pebrero 19, 2026.
Ang maong akto kay nakuhaan pa og video sa mga personahe sa Cebu City Hall nga nakadestino sa Bloc 27 diin ang tensyonadong lalis niini tali sa mga garbage collectors sa Mabolo kay misangpot una sa pagbabag sa ilang sakyanan aron dili makasulod ang ubang garbage trucks sa laing barangay hangtod na sa mi-yagyag sa basura gikan sa ilang dump truck ang mga Mabolo garbage collectors sa entrada nga gate sa maong lote.
Gani sa eksklusibong pakighinabi sa Bombo Radyo Cebu News Team kang Mabolo Barangay Captain Atty. Daniel Francis Arguedo nga nagpadayag kini sa iyang kahasubo ngadto kang Cebu City Mayor Nestor Archival Sr. kay kaniadtong Pebrero 9 kay gipahibalo sila sa City Hall gikanselar ang ilang DEMO activity sa Block 27 ug dili na sila makalabay sa ilang basura sa Consolacion landfill tungod sa limitasyon nga gilatid sa maong pasilidad gikan sa mga basura sa dakbayan sa Sugbo.
Ingon man nga mipadala pa kini sila og liham ngadto sa Office of the Mayor nga tugotan sila nga muokupar sa gamayng bahin sa Block 27 aron sa ilang material recovery efforts apan tak-om ug kalihom lang ang ilang nadawat. Gitawag sab sa kapitan nga bakak ang mga impormasyon nga dili segregated ang mga basura sa ilang barangay kay sila striktong nagpatuman niini a ilang mga residente.
Nanawagan si Arguedo og proper coordination ngadto kang Mayor Archival aron masiguro nga ang garbage collection kay mapatuman nga episyente, patas ug tukma sa lokal nga regulasyon.
Sa pagkakaron, wala pay pamahayag ang City Hall kabahin sa maong isyu apan niadtong Huwebes sa hapon kay gilimpyo na sa mga personahe sa Department of Public Services ang basurang nagtambak sa entrada sa Block 27.
