Gipunting sa Kamara de Representantes nga ilakip ang gisugyot nga
‘Anti-Political Dynasty Law’ isip usa sa mga dakong kalampusan nga mahimong ikapasigarbo sa umaabot nga State of the Nation Address (SONA) ni Ferdinand Marcos Jr. karong Hulyo.
Sumala ni Zia Alonto Adiong, chairman sa House Committee on Suffrage and Electoral Reforms, ang maong balaodnon mao ang “numero unong prayoridad” sa Legislative-Executive Development Advisory Council (LEDAC).
Tungod niini, gipadali sa Kamara ang deliberasyon ug pagpasar sa maong balaod sa dili pa ang bakasyon sa Kongreso sa Kwaresma o Lenten break .
Matod pa ni Adiong, dako ang kahulugan sa paglihok sa Kamara sa isyu sa political dynasties, ilabi na nga bisan adunay probisyon batok niini sa 1987 Constitution, wala pa’y napasar nga enabling law sulod sa halos upat ka dekada.
Ang Anti-Political Dynasty Bill nagtinguha nga maglatid og klarong depinisyon ug limitasyon sa pagdagan o paglingkod sa mga miyembro sa parehas nga pamilya sa lokal ug nasyonal nga mga posisyon sa gobyerno.
