Gisalikway sa International Criminal Court (ICC) ang hangyo sa kampo ni kanhi Presidente Rodrigo Duterte nga i-disqualify ang tulo ka abogado sa mga biktima sa drug war.
Sa siyam ka pahina nga gi-redact nga bersyon sa desisyon nga gipublikar niadtong Biyernes, Pebrero 20, ang chmaber miingon nga ang mga argumento sa depensa napakyas sa pagpakita og conflict of interest sa bahin sa mga abogado nga sila si Atty. Joel Butuyan ug Atty. Gilbert Andres, ubos sa artikulo 16 sa Rome Statute.
Kahinumduman nga ang legal team sa kanhi Presidente nangayo usab sa Chamber niadtong Pebrero 11 nga mandoan ang ICC Registry nga suspendihon ang pag-access ni Atty. Butuyan, Atty. Andres uban ni Atty. Nicolene Arciana sa rekord sa kaso samtang naghulat sa desisyon.
Ang basehan sa depensa sa paghangyo sa disqualification sa tulo ka legal representatives mao ang giingong “impediment to representation” tungod sa conflict of interest, tungod kay si Butuyan ug Andres giingong adunay propesyonal nga relasyon kang Arcaina, nga kuno naghatag og impresyon sa bias nga makaapekto sa integridad sa mga proseso nga ipahigayon.
