Nadakpan sa hiniusang pwersa sa mga otoridad ang usa ka 22-anyos nga lalaki nga nakuhaan og bulto-bultong ilegal nga drugas nga mobalor og ₱10.2 milyon atol sa gipahigayon nga anti-drug operation niadtong Pebrero 19, 2026, sa Zuellig Street, Barangay Subangdaku, dakbayan sa Mandaue.
Giila ang suspek nga si alyas “John,” residente sa Barangay Pardo, dakbayan sa Sugbo, kinsa nakuhaan og gibana-banang 1.5 ka kilo nga gidudahang shabu alas 10:34 sa gabii.
Atol na sa eksklusibong pakighinabi sa Bombo Radyo Cebu newsteam kang LtCol. Mercy Villaro, ang tigpamaba sa Mandaue City Police Office, iyang gikabutyag nga ang maong malampusong operasyon gilusad sa City Intelligence Unit (CIU) o ang City Drug Enforcement Unit (CDEU) sa Mandaue City Police Office (MCPO) uban ang Regional Police Drug Enforcement Unit-7 (RPDEU), PNP Drug Enforcement Group – 7 (PDEG-7), ug mga operatiba sa Philippine Drug Enforcement Agency (PDEA).
Bisan pa man sa iyang kabatan-on, giila sa kapulisan ang suspek isip usa ka High-Value Individual (HVI) sa lokal nga drug network, tungod sa gidaghanon sa drogas nga nasakmit gikan sa suspetsado.
Gidugang usab nga si alyas “John” giingong usa sa mga nag-unang supplier nga maka-apod-apod og hangtod sa duha ka kilo nga shabu matag semana sa Mandaue ug mga silingang dapit.
Nasayran usab nga kaniadto na nga nabilanggo ang suspek niadtong tuig 2022 tungod sa kasong paglapas sa Section 5 ug 11 sa R.A. 9165.
Nakagawas lamang kini niadtong Oktubre 2024 pinaagi sa plea bargain, apan mibalik gihapon sa iyang ilegal nga kalihokan.
Sa pagkakaron, gibasahan na ang suspek sa iyang mga katungod ug pasakaan na usab og tukmang kaso samtang nagpadayon ang validation sa kapulisan sa uban pa niyang mga koneksyon sa ilegal nga drug trade.
