Gipanglantawan sa Department of Public Works and Highways (DPWH) nga mapasugdan og patrabaho pagbalik karong hinapos sa tuig 2026 ang Metro Cebu Expressway, nga sa pagkakaron, nabalda tungod sa isyu sa Right of Way, ug sa nahunlak nga Segment 1 didto sa Dakbayan sa Naga.
Kini ang gikabutyag ni DPWH Undersecretary Ador Canlas atol sa “Usapang Budget Forum” nga gipahigayon aron mapasabot ang pondo nga gitagana sa National Budget ngadto sa mga ahensiya, proyekto ug programa sa gobyerno alang sa Central Visayas.
Matud pa ni Canlas, nahuman na ang Detailed Engineering Design alang sa mao nga dalan nga magsugod og agi Dakbayan sa Naga, ug matapos sa Dakbayan sa Danao, apan giresolbar pa sa maong buhatan ang mga problema sa pagpabayad sa Right of Way sa luna na maagian sa maong proyekto.
Dugang pa, gikabutyag usab ni Canlas nga aduna pay nahibilin nga igong pondo ang mao nga proyekto sa tuig 2025 nga wala napatuman tungod sa isyu sa Right of Way, apan karon iyang gimandoan ang buhatan sa DPWH-7 sa pagpasa og request alang sa pondo sa pagbayad sa Right of Wa aron masugdan na kini og trabaho.
Gihimug-atan usab ni Canlas nga ang DPWH gihapon ang mag implentar sa Segment 1 ug sa pagpalit og Right of Way, samtang ang mga nahibiling Segments 2 ug 3, gipanglantawan nga trabahoon sa Cebu Provincial Government ug sa pribadong kompanya pinaagi sa Public Private Partnership (PPP), ug wala pa kini inisyal nga buwan kung kanus-a kini mapasugdan.
Subay niini, gipasalig ni Canlas nga mabayaran sa mao nga buhatan ang Right of Way para sa mga luna nga maagian sa mao nga proyekto tungod sa 2026 National Budget, diin adunay gitagana nga 7 bilyones ka pesos para sa mga proyekto sa tibuok nasud apan kung nakuwangan kini, aduna kini luna alang sa augmentation.
Ingun man nga gikabutyag usab sa DPWH nga niining tungura, nagpadayon gihapon ang rehabilitation sa nahunlak nga bahin sa Segment 1, ug gipanglantawan nga mahuman ang mao nga rehabilitation sa buwan sa Hulyo karong tuiga aron masugdan na pagpatrabaho og balik ang Expressway para makatabang sa problema sa trapiko sa Metro Cebu.
