Gitapos na sa International Criminal Court (ICC)Pre-Trial Chamber I ang confirmation of charges hearing sa kasong Prosecutor v. Rodrigo Roa Duterte kagahapong adlawa sa Biyernes, Pebrero 27, 2026.
Ang ICC Pre-Trial Chamber I kay gilangkoban nila ni Presiding Judge Iulia Antoanella Motoc, Judge Reine Adélaïde Sophie Alapini-Gansou ug Judge María del Socorro Flores Liera.
Katuyoan sa confirmation of charges hearing kay para masuta sa mga hukom kung aduna bay igong ebidensya sa krimeng nabuhat sa akusado. Kung makumpirmar kini, mapahigayon ang full trial sa Trial Chamber.
Human sa hearing sa oral submissions sa Prosecutor, Common Legal Representatives of the Victims ug sa Defense team, gipaminaw sa mga pre-trial judges ang mga statements sa mga partido bisan man nga wala mipatim-aw sa Chamber ang akusadong si Duterte human niya gi-waive ang iyang katungod sa pagtambong sa pagdungog.
Sulod sa musunod nga 60-ka adlaw, magpahigayon og pribadong deliberasyon ang mga hukom subay sa Regulation 53 sa Regulations of the Court.
Adunay tulo ka posibilidad nga padulgan ang proseso sa kaso nga mao ang musunod:
- Unang posibilidad, kung makumpirmar ang reklamo tungod sa igong ebidensya nga napresentar kay mulahos kini sa Trial Chamber;
- Ikaduhang posibilidad, kung gi-decline ang reklamo tungod sa pagdeterminar nga dili kaigo ang mga ebidensya kay hunungon ang proceedings sa akusado;
- Ikatulong posibilidad kay kung i-adjourn ang hearing ug i-request ang Prosecutor sa pagdugang sa mga ebidensya pinaagi sa pagpahigayon og dugang imbestigasyon o i-amender ang mga reklamo.
Ang Defense team ug Prosecutor kay dili direktang maka-apelar sa desisyon pan mamahimo silang musugyot sa authorization gikan sa Pre-Trial Chamber aron maapelar kini.
