CENTRAL VISAYAS- Gipirmahan ang Memorandum of Agreement (MOA) alang sa Solar Solutions for Government: Energy Efficiency and Renewable Energy in Public Buildings (SSG-ERPB) tali sa Department of Energy ug mga lokal nga kagamhanan sa Central Visayas, lakip na ang Mandaue City, Cebu City, Lapu-Lapu City, Province of Cebu, ug Province of Bohol, sa usa ka seremonya nga gipahigayon sa usa ka hotel kagahapon, Pebrero 27.
Gitambongan ang maong MOA signing sa mga kadagkuan sa nagkadaiyang LGU, lakip na si Thadeo Jonkie Ouano, Mayor sa Mandaue City, nga nagpahayag sa importansya sa panaghiusa ug panagtinabangay sa pagpalambo sa energy efficiency ug renewable energy sa mga public buildings sa rehiyon.
Matud sa Department of Energy, ang SSG-ERPB usa ka inisyatiba nga nagtinguha nga momenos ang konsumo sa kuryente sa mga building sa pang-gobyerno, samtang gipalapdan ang paggamit sa solar ug limpyo nga enerhiya nga direkta’ng makabenepisyo sa komunidad.
Mihatag og mensahe si Sharon S. Garin, Secretary sa DOE, nga mipadayag sa mainiton nga pagsuporta sa mga LGU sa Cebu ug Bohol sa ilang kooperasyon ug interes sa proyekto.
Matud pa niini, ang matag kasabutan nga gipirmahan usa ka lakang padulong sa mas lig-on, episyente, ug sustainable nga sistema sa enerhiya.
Gidugang pa sa Kalihim nga pinaagi sa aktibong partisipasyon sa mga LGU, mahimo silang mahimong ehemplo o “energy warriors” nga sundon sa ubang rehiyon sa nasud.
Misaksi sa pagpirmahay sila Mario C. Marasigan, DOE Undersecretary; Joseph Felix Marie H. Durano, Provincial Administrator sa Cebu; Annabeth Cuizon, representante sa Mayor sa Lapu-Lapu City; Kenneth Siasar, representante sa Mayor sa Cebu City; ug Erico Aristotle C. Aumentado, Gobernador sa Bohol, uban sa mga kawani sa DOE ug mga kauban nga LGU.
