Nakaplagang guilty sa korte sa Estados Unidos ang Pakistani nga si Asif Merchant sa giingong plano sa pagpatay kang U.S. President Donald Trump ug uban pang prominenteng Amerikanong politiko duha ka tuig na ang milabay.
Sumala sa US Department of Justice (DOJ), si Merchant misulay sa pag-recruit og mga tawo sa US aron ipatuman ang plano sa pagpatay isip panimalos sa pagpatay sa US sa Iranian military commander nga si Qassem Soleimani niadtong 2020, sa dihang si Trump naa sa iyang unang termino isip presidente.
Gawas kang Trump, ang plano sa 2024 giingong nagtumong usab sa kanhi U.S. President Joe Biden ug Nikki Haley, kinsa niadtong panahona midagan batok kang Trump alang sa nominasyon sa pagka-presidente sa Republican Party.
Si Merchant nakitang sad-an sa “murder for hire” ug pagsulay sa terorismo, nga giingong gimando sa mga awtoridad sa Iran.
Sa iyang husay sa Brooklyn, New York, giangkon ni Merchant nga nalambigit sa plano ug nakigkontak sa Islamic Revolutionary Guards Corps (IRGC) sa Iran. Bisan pa, miingon siya nga gibuhat niya kini batok sa iyang kabubut-on aron mapanalipdan ang iyang pamilya sa Tehran.
Miingon siya nga wala siya gihatagan og direktang mando sa pagpatay sa usa ka piho nga tawo, apan ang iyang Iranian handler naghisgot og tulo ka posibleng target sa ilang mga panagsulti sa Iran.
Napakyas ang plano human ang usa ka tawo nga nakontak ni Merchant niadtong Abril 2024 nagtaho sa iyang mga kalihokan ngadto sa mga awtoridad ug nahimong usa ka confidential informant. Tungod niini, siya gidakop sa wala pa mahimo ang bisan unsang pag-atake.
Samtang, kanunay nga gihimakak sa Iran ang mga akusasyon nga ilang gitarget si Trump o uban pang mga opisyal sa US. Ang isyu miabot taliwala sa nagkagrabe nga tensyon ug panagbangi sa rehiyon nga naglambigit sa US, Israel, ug Iran.
