Palapdan sa U.S. State Department ang ilang pag-susi o screening sa mga social media account sa mga foreign journalists nga nag-apply og visa aron makatrabaho sa Estados Unidos.
Ang lakang kabahin sa gipalapdan nga palisiya nga gi-isyu sa administrasyon ni U.S. President Donald Trump sukad sa pagsugod sa iyang ikaduhang termino niadtong Enero 2025, diin matod pa, gikinahanglan usab nga i-publiko ang mga social media account sa mga aplikante aron kini masusi sa mga opisyal sa Estados Unidos.
Bisan wala gikumpirma sa U.S. State Department ang sulod sa internal memo, giingon niini nga gigamit niini ang gitawag nga “online presence vetting” aron masiguro nga ang mga aplikante kwalipikado ubos sa balaod sa U.S. ug dili gibase sa hulga sa nasudnong seguridad, kaluwasan sa publiko, o interes sa nasud.
Gidugang sa ahensya nga ang mga opisyal sa visa naggamit ug lainlaing mga pamaagi aron masusi ang mga aplikasyon aron mapugngan ang pagpanglimbong ug mapanalipdan ang nasudnong seguridad.
Sa karon, wala pa’y klaro nga petsa kung kanus-a opisyal nga moepekto ang gipalapdan nga palisiya.
Sa miaging bulan, ang Department of Homeland Security (DHS) naghigpit usab sa mga lagda alang sa mga langyaw nga tigbalita, internasyonal nga mga estudyante, ug uban pang mga naghupot og visa nga magpabilin sa Estados Unidos. Kini nakapataas sa mga kabalaka sa pipila ka mga tigpasiugda sa sibil nga kagawasan, kinsa nag-ingon nga ang ilang freedom of speech mahimong maapektuhan.
Kahinomdoman usab nga ang U.S. kaniadto nag-ingon nga ang Citizenship and Immigration Services (USCIS) nag-ingon usab nga gisusi niini ang mga post sa social media sa mga imigrante ug mga aplikante sa visa, lakip kadtong giisip nga antisemitic o anti-American.
Dugang pa, gikansela usab sa administrasyon ang mga visa sa daghang mga langyaw nga estudyante nga miapil sa mga protesta nga pro-Palestinian ug nagtinguha nga i-deport ang pipila kanila.
