Gihangyo ni Deputy Speaker Paolo Ortega V ang House Committee on Justice nga ilakip ang kanhi Overall Deputy Ombudsman nga si Melchor Arthur Carandang isip resource person sa hearing sa mga impeachment complaints batok kang Bise Presidente Sara Duterte, ilabina sa isyu sa Statements of Assets, Liabilities and Net Worth (SALN) ug giingong wala mapasabot nga bahandi.
Sumala ni Ortega, si Carandang adunay direktang kasinatian sa pagsusi sa mga rekord sa bangko ug mga transaksyon sa pinansyal nga may kalabotan kang kanhi Presidente Rodrigo Roa Duterte ug mga miyembro sa iyang pamilya, lakip si VP Sara.
Nagtuo si Ortega nga ang kahibalo ni Carandang makatabang sa komite nga mas masabtan kung giunsa pagsusi sa mga imbestigador ang mga rekord sa bangko ug mga pagbutyag sa SALN.
Si Carandang nagsilbi isip Overall Deputy Ombudsman gikan sa 2013 hangtod 2019 ug nagdumala sa mga dagkong kaso sa korapsyon sa opisina sa Ombudsman.
Nahimo siyang balita sa nasud niadtong 2017 sa dihang iyang gikumpirmar nga ang Ombudsman nakakuha og mga rekord sa transaksyon sa bangko gikan sa Anti-Money Laundering Council (AMLC) isip kabahin sa imbestigasyon sa reklamo sa plunder batok kang kanhi Presidente Duterte ug sa iyang pamilya.
Ingon man nga usa usab siya ka tigpaluyo sa ikaupat nga impeachment complaint batok ni VP Sara, diin miingon nga ang testimonya sa mga eksperto sa pinansyal nga imbestigasyon magpalig-on sa fact-finding sa komite.
Ang ikaupat nga impeachment complaint nag-alegar sa graft, bribery, procurement iregularities, unexplained wealth, ug misdeclarations sa SALN.
Nakita sa House Committee on Justice nga igo na ang porma ug substansiya sa reklamo, busa nagpadayon ang mga hearing.
Ang sunod nga lakang mao ang pagsusi ug pagtino sa probable cause sa maong reklamo sa dili pa kini ipresentar sa plenaryo sa Kongreso alang sa dugang nga aksyon.
