CEBU CITY- Magdeploy ang Kagamhang Dakbayan sa Sugbo sa siyam ka mga Green City buses niini isip pag-abag sa mga commuters kung magnihit ang mga namasaherong jeep sa kadalanan.
Kini ang gipamahayag ni Cebu City Councilor Dave Tumulak sa eksklusibong pakighinabi niini sa Bombo Radyo Cebu Newsteam.
Matod pa sa konsehal nga nahinabi na niini si Cebu City Mayor Nestor Archival Sr. kabahin sa maong inisyatiba sa pagpadeploy sa city buses kay aron makatabang sa mga namauli nga mga pasahero padulong sa ilang panimalay human sa adlaw nga trabaho apan malangan kay nihit ang nanagan nga mga jeep mugna sa krisis sa petrolyo.
Sa samang bahin, nag-awhag sab si Tumulak sa publiko nga magdaginot sa paggasto karong panahona kay dili matag-an kung asa kutbo ang lahutay sa kagubot sa Middle East nga nakapahinabo sa krisis sa petrolyo og nakaapektar sa presyo sa tanang palaliton.
Kahinumduman nga sa nakalabayng mga adlaw una nang nagmando ang kagamhanang dakbayan sa pagpaminus sa paglarga sa mga city-owned vehicles ug paglaslas sa gitaganang alokasyon sa krudo aron sa pagtipid karong panahona.
