CEBU CITY- Nasikop sa Anti-Cybercrime Group (ACG) sa PNP ang upat ka Korean nationals dinhi sa dakbayan sa Sugbo tungod sa kalambigitan niini sa illegal online gambling niadtong Miyerkules, Marso 11, 2026.
Sumala pa sa pamahayag ni ACG director Police BGen. Wilson Asueta nga nagpanikad ang ilang operasyon based sa serach warrant nga giluwat sa Cebu Regional Trial Court Branch 7.
Dugang pa nga ang ilang intelligence-driven operation kay gisugdan kaniadtong pang Marso 2 sa gabii sa usa ka condominium complex sa dakbayan. Gawas pa nga naglusad pud sila og cyber-patrolling aron masuta ang illegal nga kalihukan sa mga langyaw.
Giila ang mga dinakpan nga sila “Yun,” 29-anyos; “Kung,” 35-anyos; “Lun,” 38-anyos; ug si “Song,” 38-anyos.
Matod pa nga ang maong grupo kay dul-an lima ka tuig nang nag-operate diri sa nasud diin aduna silay mga lokal ug langyaw nga mga mamustahay pinaagi sa ilang gitukod nga website nga naka-advertise pa sa pipila ka mga social media platforms.
Asoy pa niini nga ang ilang modus operandi kay ang pagpadaug una sa mga mamustahay aron maingganyo mubalik hangtod sa ma-adik na sa sugal.
Nakigkoordinar na ang kapulisan sa Bureau of Immigration aron i-validate ang mga papeles sa mga Koreano diri sa Pilipinas.
Maatubang kini sila sa kalapasan sa RA 9287 kun illegal gambling law ug Section 6 sa RA 10175 kun Cybercrime Prevention Act of 2012.
