CENTRAL VISAYAS- Nagpalig-on sa koordinasyon ang mga ahensya sa gobyerno ug law enforcement sa Central Visayas atol sa ika-13 nga meeting sa Regional Law Enforcement Coordinating Committee (RLECC-7) nga gipahigayon sa Police Regional Office 7 (PRO-7).
Gipangulohan ang meeting ni Redrico A. Maranan, Regional Director sa PRO-7 ug Chairperson sa RLECC-7, uban sa pag-apil sa mga opisyal ug representante gikan sa nagkadaiyang law enforcement ug partner nga ahensya sa gobyerno sa rehiyon.
Gipasiugda sa meeting ang kahinungdanon sa “whole-of-government approach” samtang nagbinayloay ang mga ahensya sa mga update ug panan-aw kabahin sa posibleng epekto sa nagpadayon nga krisis sa Middle East, ilabina sa ekonomiya sa rehiyon, presyo sa krudo, ug suplay sa mga batakang panginahanglanon.
Tumong niini nga mapalig-on ang contingency plans ug masiguro ang koordinadong tubag kung adunay mosangpot nga ekonomikanhon o seguridad nga hagit.
Matod ni Maranan, importante ang hugot nga koordinasyon ug panaghiusa sa mga institusyon sa gobyerno aron mapadayon ang kalig-on sa rehiyon, labi na sa panahon nga ang mga global nga panghitabo mahimong adunay dili diretsong epekto sa lokal nga komunidad.
Pinaagi sa padayon nga inter-agency cooperation ug strategic coordination, ang RLECC-7 nagpabiling importante nga plataporma sa pagpalambo sa usa ka komprehensibo ug nagkahiusang pamaagi sa seguridad ug pamalaod sa Central Visayas.
