Hingpit na nga nahimong balaod ang balaodnon nga naghatag og gahom sa presidente sa pagpakunhod o pagsuspenso sa excise tax sa lana.
Kini nahitabo human gipirmahan ni Presidente Ferdinand Marcos Jr. ang Republic Act No. 12316.
Ubos sa balaod, ang presidente gihatagan og mga gahom sa emerhensya sa pagsuspenso o pagpakunhod sa excise tax sa mga produktong petrolyo, basi sa rekomendasyon sa Development Budget Coordination Committee (DBCC) ug sa koordinasyon sa Kalihim sa Department of Energy.
Kini nga gahom magamit kung ang presyo sa krudo sa internasyonal nga merkado moabot o molapas sa 80 dolyares matag bariles sulod sa usa ka bulan.
Sumala sa balaod, ang pagsuspenso o pagkunhod sa buhis mahimong ipatuman sa piho nga mga produkto sa petrolyo.
Mahimo usab kini ipatuman isip usa ka hingpit nga pagsuspenso o partial nga pagkunhod sa excise tax, depende sa naglungtad nga kahimtang sa ekonomiya ug presyo sa lana.
Giklaro usab nga ang pagpatuman sa pagsuspenso o pagkunhod sa excise tax dili molapas sa tulo ka bulan sulod sa usa ka tuig.
Kini kabahin sa mga lakang sa gobyerno aron makunhuran ang epekto sa padayon nga pagtaas sa presyo sa lana sa mga lungsuranon, labi na sa mga pletehan, presyo sa mga palaliton, ug gasto sa transportasyon.
Ang balaod mahimong epektibo kinse ka adlaw human kini mapatik sa Official Gazette o sa usa ka mantalaan nga adunay kaylap nga sirkulasyon.
