Posibleng maapektuhan ang katungod sa katawhan kung hingpit na gayud nga ipatuman ang mando gikan sa Department of the Interior and Local Government kon (DILG) sa inisyatiba nga “Safer Cities” sa mga sakop sa Philippine National Police.
Matud ni Atty. Arvin Odron, ang Regional Director sa Commission on Human Rights-Central Visayas nga posible gayud nga makalapas kini sa katungod sa katawhan, hilabi na sa katungod sa pagpadayag og katungod sa mga lihok.
Sigon niini nga dili nani bag-o nga mga inisyatiba sa kagamhanan apan wala pay mga balaud nga napasar mahitungod sa pagbawal sa usa ka indibidwal nga mag-inom sa daplin sa kadalanan lakip na usab ang pag-topless sa mga pampublikong lugar.
Apan sa pikas bahin, gibutyag niini nga tumong sa kagamhanan nga mao ang hingpit nga malinawon og luwas nga komunidad diin gilatid usab sa pipila ka mga balaud sama sa Republic Act No. 11313 “Safe Spaces Act” o ang “Bawal bastos law” alang sa pagpanalipod sa kababayen-an.
Gihimug-atan ni Atty. Odron, nga kinahanglang ikonsiderar sa kagamhanan nga ang Pilipinas usa ka tropikal nga nasud diin makasinati og mainiton nga panahon og gidugang pa niini nga makonsiderar kini nga Anti-Poor diin mas maapektuhan niini ang mga kabos hilabi na ang walay igo nga ispasyo sa panimalay.
Gikalipay usab niini nga gisuspenso una sa DILG ang pagpanakop sa mga indibidwal nga magtopless sa pampublikong lugar gumikan sa pag-angal sa mga tawo bahin niini hilabi na sa social media.
Mensahe usab ni Odron sa kagamhanan nga unta mahimong patas ang pagpatuman sa maong inisyatiba og dili itutok lang sa mga anaa sa marginalized areas inay ipatuman kini sa kinatibuk-an og dili magbase sa estado sa kinabuhi.
