CEBU CITY- Gipaambit sa magtiayon nga sila si Iluminado ug Lucena Ardiente nga ang gugma, pag-ampo sa Ginoo, ug pagsinabtanay mao’y nagdala kanila sa pagkab-ot sa ilang ika-50 ka tuig sa kaminyoon.
Sa pakighinabi sa Bombo News team, matod pa ni Iluminado nga sulod sa maong katuigan, maihap ra sa kamot ang ilang panaglalis, ug kon adunay dili pagsinabtanay, ilang lingkoran ug tarong nga hisgutan aron masulbad.
Sa ilang panag-uban, gipanalanginan sila og lima ka buotan nga mga anak nga wala gayod naghatag kanila og kasakit.
Gipaambit usab ni Iluminado nga kaniadto mag-bestfriend sila ni Lucena, apan sa wala damha, nakabati siya og lalom nga pagbati alang kaniya. Kini ang hinungdan nga iyang gipadayag ang iyang gugma, nga mitultol sa ilang pagpakasal.
Gani, ilang gituman ang panumpa sa kasal nga magtinabangay ug mag-inunongay hangtod sa hangtod.
Matod pa ni Lucena, ang saad sa iyang bana kaniya mao nga kamatayon lamang ang makabulag kanila.
Sa katapusan, nihatag sila og pahimangno sa mga manag-uyab ug magtiayon nga kon kinsa man ang makasala, kinahanglan mangayo og pasaylo ug mag-ampo sa Ginoo aron lamdagan ang ilang hunahuna isip giya aron molungtad ang ilang panag-uban.
