Gidumog karon ang Snack Kingdom sa Furong Square sa Changsha, China, nga giingong pinakadakong snack store sa kalibotan tungod sa kapin 12,000 square meters nga kadak-on niini ug nagbaligya og sobra sa 35,000 ka klase sa snacks gikan sa 70 ka nagkalain-laing nasod.
Gihimo kini sa Mingming Henmang, ang pinakadakong snack retail chain sa China nga aduna’y kapin 6,500 ka snack brands gikan sa tibuok kalibotan ug nakadawat dayon og titulo sa Guinness World Record isip “World’s Largest Snack Store” sa adlaw sa pag-abli niini niadtong Abril 17.
Pagkasulod sa tindahan, makita ang taas nga “snack corridor” nga puno sa colorful nga snacks nga naka-display sa glass cabinets.
Usa sa labing talagsaon nga bahin mao ang “Instant Noodle City” nga adunay sobra 3,500 ka klase sa instant noodles gikan sa lain-laing nasod ingon man cola section nga adunay cola gikan sa mga 20 ka nasod, lakip na ang talagsaong flavors sama sa salted cola.
Tungod sa kadaghan sa bisita, napugos ang management nga temporaryong mohunong sa baligya duha ka adlaw human sa grand opening aron ayuhon ang pag-restock, checkout system, ug uban pang problema. Bisan pa niini, gitugotan gihapon ang mga tawo nga mosuroy ug magkuha og litrato sulod sa tindahan.
Makalingaw usab nga ang Changsha adunay laing dako nga snack store nga nagbaligya og higanteng bersyon sa sikat nga snacks sama sa Lay’s chips, Oreo, ug instant noodles.
