Napalgang patay sulod sa iyang selda sa Cebu City Jail si Fernando Abapo Prajes, ang suspek sa pagpanglugos sa usa ka 11 anyos nga batang babaye sa Sitio Kalubihan, Barangay Kalunasan, Dakbayan sa Sugbo, niadtong Domingo sa hapon, Abril 26, 2026.
Nadiskubrehan nga walay panimuot sulod sa iyang selda si Prajes mga alas 1:00 sa hapon ang 37 anyos, usa ka habal-habal driver, hinungdan nga gidala dayon kini sa Cebu City Medical Center, apan gideklarar nga dead on arrival sa mga doktor.
Subay niini, ang Cebu City Police Office (CCPO) nagpadayon sa imbestigasyon niini uban sa koordinasyon sa Bureau of Jail Management and Penology (BJMP), nga nagdumala sa Cebu City Jail.
Basi sa inisyal nga mga report, namatyagan nga si Prajes nakit-ang walay panimuot sulod sa iyang selda, ug ang mga kaubang Persons Deprived of Liberty (PDLs) nagpahibalo sa mga awtoridad sa prisohan, hinungdan nga dali siyang gidala sa ospital, apan ang mga paningkamot nga i- revive kini, wala molampos.
Sa karon, buot sa pamilya ni Prajes ang usa ka autopsy aron masayran ang eksaktong hinungdan sa kamatayon.
Samtang ang mga paryente nagduda usab nga posible nga giatake siya samtang naa sa detensyon. Apan, giklaro niini nga maghuwat una sila sa resulta sa autopsy sa dili pa mohatag og bisan unsang pamahayag kabahin sa panghitabo.
Kahinomdoman nga si Prajes giakusahan sa sexual assault sa iyang 11 anyos nga silingan niadtong Marso 7, 2026, diin human sa insidente, nibakwit siya ngadto sa lungsod sa Alegria, Cebu, diin nagpuyo ang iyang mga ginikanan.
Human niana, mibiyahe kini paingon sa Negros ug misakay og barko sa Bacolod City paingon sa Manila, hinungdan nga temporaryong nakalikay kini sa mga awtoridad nga naggukod kaniya.
Apan, sa dihang nahibal-an niya ang iyang mga lihok, ang Cebu City Police Office (CCPO) nakig-alayon sa Criminal Investigation and Detection Group–National Capital Region Field Unit, uban sa Philippine Coast Guard Sea Marshals, Philippine Ports Authority, ug Manila Police District, diin niresulta sa pagkasikop niini niadtong Marso 9, 2026, sa pag-abot niya sa Port of Manila.
