Patay ang usa ka indibidwal ug laing usa ang naangol human sa nahitabong panagbangga tali sa motor ug ambulansya sa Barangay Langtad, Argao, kagahapon, Huwebes, Abril 30, 2026.
Giila ang nakalas nga si Jovee Emia Lomocso, lumulupyo sa Dalahikan, Samboan, sakay sa motor, samtang naangol usab ang drayber nga si Karl Catubig, residente sa Brgy. Colasi, sa samang lungsod.
Nailhan usab ang drayber sa ambulansya nga si Melchor Pacatang Bancal Jr., 55 anyos, minyo, taga Brgy. Daanlungsod, Oslob, ug drayber sa Ambulansya sa lungsod sa Oslob.
Sumala sa imbestigasyon, ang duha ka sakyanan nag-agi sa managlahing direksyon diin ang motor paingon sa habagatan samtang ang ambulansya paingon amihananang dapit.
Gikatahong pas-pas nga nakapadagan ang driver sa ambulansiya ngadto sa 70kph ug kalit nga misayaw ang sakyanan samtang naglatas sa kurbada.
Tungod niini, nalapas kini sa pikas lane ug naigo ang unahan nga tuo nga bahin sa motor, hinungdan sa kakusog sa impact, nalabay ang drayber ug pasahero sa motor nga miresulta sa pagkakalas sa angkas niini.
Dali silang gidala sa tambalananl sa Argao, apan ang pasahero gideklarang dead-on arrival.
Padayon pa ang imbestigasyon sa insidente samtang ang drayber sa ambulansya anaa karon sa kustodiya sa kapulisan.
