Giklaro ni Cebu City Councilor Winston Pepito, ang Chairman sa Transportation Committee, nga ang pagpadayon sa pagtukod sa Cebu Bus Rapid Transit (CBRT) project sa Dakbayan sa Sugbo, wala gi re-route, apan gipun-an lang ang ruta niini.
Matud niini nga dli tinoud ang gisugot ni Cebu City Vice-Mayor Tomas Osmeña, nga usbon og ibalhin ang ruta nga anaa sa orihinal nga plano sa CBRT nga gikan sa Bulacao padulong sa Talamban route, Inay gipun-an lang kini og ruta padulong sa South Road Property (SRP).
Sigon ni Pepito, nga dili tinoud nga ang CBRT project alang sa mga adunahan, apan alang kini sa mga liboan ka mga mamumuo og commuters nga buot mobisita sa lugar, gumikan kay ang SRP dili lang usa ka business hub, apan makonsiderar usab nga tourist spot.
Gihimug-atan sa opisyal, nga dili mahimong usbon sa Department of Transportation (DOTr) ang orihinal nga plano sa proyekto gumikan kay aprobado na ang loan niini sa World Bank, og dili kini itugot sa maong International financial Institution tungod kay langkob niini ang Bulacao-Talamban route.
Dugang pa ni Pepito, nga nagpakitabang ang buhatan sa DOTr ngadto sa konseho nga hingpit na nga maaprobahan ang maong plano, aron masugdan na og trabaho sa bahin sa SRP sa dili pa ma-expire ang loan sa World Bank.
Kini gumikan kay mas dali trabahoun ang bahin sa SRP tungod sa kalapad sa luna niini ug dili na makamugna og kahout sa dagan sa trapiko, gumikan kay walay mga edipisyo og imprastraktura ang angayang gub-on alang sa road widening.
Kahinumdoman, nga mipadayag sa iyang kadismaya si Vice-Mayor Tomas Osmeña atol sa uwahing regular session sa konseho, human niini nasayran nga adunay planong i-reroute ang CBRT project nga gikan sa Bulacao-Talamban route ngadto paingun sa SRP, ug mibahad nga mokanaug siya isip bise-mayor kung ugaling aprobahan kini sa konseho.
