Gipaspasan karon sa Bureau of Fisheries and Aquatic Resources Region 7 (BFAR-7) ang paghatag og fuel subsidy ug cash assistance alang sa mga mangingisda sa tibuok Central Visayas, dungan sa pahimangno nga ang pagparehistro maoy yawe aron makadawat sa tanang suporta gikan sa gobyerno.
Gipasabot sa BFAR-7 nga adunay duha ka dagkong programa nga dungan nga gipatuman, ang fuel subsidy program nga nagsugod pa niadtong 2022 ug ang Presidential Assistance to Farmers and Fisherfolk Program (PAFFP).
Matod ni Ionne Elena Villagonzalo, hepe sa Regional Fisheries Training and Fisherfolk Coordination Division, ang maong subsidiya sa krudo alang lamang sa mga rehistradong mangingisda nga naggamit og de-makina nga sakayan ug nalakip sa Municipal Fisherfolk Registration System (FishR).
Gipahumdum sa buhatan nga libre ug tibuok kinabuhi ang maong registration, hinungdan nga walay rason nga dili mosunod ang mga mananagat.
Sa pagkakaron, moabot na sa 15,761 ka mga mangingisda gikan sa Sugbo, Bohol, Negros Oriental, ug Siquijor ang nakadawat na sa ilang mga fuel subsidy card sukad sa paglunsad niini.
Gawas sa krudo, ang PAFFP nagtanyag usab og cash assistance nga mas dako og tabang alang sa uban pang panginahanglanon sa mga benepisyaryo.
Samtang aron maseguro ang hapsay nga pagpang-apod-apod, nakig-alayon ang BFAR-7 sa kapulisan ug nagpahigayon og hugot nga validation aron malikayan ang pagdoble sa mga makadawat og tabang.
