Gikondenar sa Partido Demokratiko Pilipino (PDP) ang kalabot sa migawas nga report bahin sa giingong arrest warrant gikan sa International Criminal Court (ICC) batok kang Senador Ronald “Bato” Dela Rosa.
Sumala ni PDP Vice National Spokesperson Ferdinand Topacio, kon mapamatud-an nga tinuod ang maong warrant, kini giingong laing dakong paglapas sa soberanya ug kagawasan sa Pilipinas isip usa ka gawasnon nga nasud.
Gikritika usab sa partido ang administrasyong Marcos tungod sa giingong pagpadayon sa kooperasyon niini sa ICC bisan pa sa pag-atras sa nasud gikan sa Rome Statute.
Giinsistir sa PDP nga ang gobyerno kinahanglan nga mo-assert sa kaugalingon niining hurisdiksyon ug dili tugotan nga maapektuhan ang dignidad sa usa ka gawasnon nga nasud ug dili molihok isip usa ka “neo-colonial lapdog” sa mga gahom sa Kasadpan.
Dugang niini nga ang pagkatalawan ug pagluib nga nahimo batok kang kanhi Presidente Rodrigo Duterte dili angay tugotan nga masubli.
Gipasiugda usab sa PDP nga si Dela Rosa napili sa minilyon nga mga Pilipino ug angayan nga panalipdan tungod sa iyang mga katungod ug hustong proseso.
Gipasalig sa partido nga gamiton niini ang tanang legal nga paagi aron depensahan dili lamang si Senador Dela Rosa apan lakip na usab ang mga katungod sa matag Pilipino batok sa giingong pag-abuso ug pamulitika.
Nanawagan usab ang PDP sa publiko nga supakon ang bisan unsang lakang nga ilang giingon nga naglapas sa mga katungod sa katawhan, pinaagi sa mga paagi nga nahiuyon sa balaod.
