Nagpadayon ang kagamhanan sa Dakbayan sa Sugbo sa paglabay og basura sa South Road Properties (SRP) bisan pa man sa mga pasidaan gikan sa Department of Environment and Natural Resources (DENR).
Gikumpirma ni Mayor Nestor Archival nga nagtapok na usab ang basura sa maong dapit human nahurot na ang kontrata sa siyudad alang sa paglabay og basura didto sa Aloguinsan landfill. Ang maong lakang gihimo samtang giusisa pa sa kagamhanan ang posibilidad sa pagbalik og gamit sa Binaliw landfill.
Samtang ang pag-angkon sa mayor nahitabo taliwala sa kamandoan sa DENR nga nagdili sa paglabay og basura sa SRP tungod sa mga kalapasan sa Ecological Solid Waste Management Act ug ang risgo nga madaut ang mga duol nga bakhawan ug kadagatan.
Sumala ni Archival, ang kontrata sa Aloguinsan dili binase sa adlaw kundi sa gidaghanon o volume sa basura, ug kini nahurot na duha o tulo na ka adlaw ang milabay, hinungdan nga napugos sila sa paggamit sa SRP isip temporaryong “staging station.”
Naglaum unta ang dakbayan nga makabalik na sa paghakot og basura ngadto sa Binaliw human makadawat og pahibalo gikan sa DENR nga nakatuman na ang operator niini nga Prime Integrated Waste Solutions sa mga kinahanglanon alang sa remediation.
Apan tungod sa mga kabalaka nga gipadangat sa City Council, nagtukod si Archival og technical team aron susihon ang tinuod nga kahimtang sa pasilidad sa Binaliw sa dili pa sila hingpit nga mobalik didto. Sa pagkakaron, ang tanang makuha nga basura sa dakbayan adto una ipundo sa SRP samtang naghulat sa report sa maong grupo.
