Gikondenar sa India ang pag-atake sa usa ka Indian-flagged cargo ship sa kadagatan sa Oman human kini nalunod tungod sa gituohang missile attack.
Sa usa ka pahayag, gitawag sa Ministry of External Affairs sa India ang insidente nga “dili madawat” ug gikondenar ang padayon nga pag-target sa mga komersyal nga barko ug mga sibilyan.
Gikumpirma usab sa India nga luwas ang tanang Indian crew members nga sakay sa barko human sila maluwas sa mga awtoridad sa Oman.
Sumala sa usa ka maritime security firm, ang barko nga nalambigit giila nga MSV Haji Ali, usa ka cargo vessel nga adunay 14 ka tripulante ug nagkarga og mga kahayopan gikan sa Berbera sa Somaliland padulong sa Sharjah, United Arab Emirates.
Usa ka kusog nga pagbuto ang gitaho duol sa baybayon sa Limah, Oman, sa Strait of Hormuz, nga gituohang resulta sa missile attack.
Human sa pagbuto, nasunog ang barko, nga maoy hinungdan sa pagbiya sa mga tripulante niini sa dili pa kini malunod.
Wala pa mopadayag ang India kung kinsa ang posibleng responsable sa maong pag-atake.
Nanawagan usab ang New Delhi nga undangon ang mga pag-atake batok sa mga komersyal nga barko ug likayan ang bisan unsang aksyon nga mahimong makabalda sa kagawasan sa nabigasyon ug internasyonal nga pamatigayon.
