Nagkahiusa ang mga miyembro sa Caritas Philippines Social Action Network sa panawagan sa Senado nga dili i-langan ang proseso sa impeachment batok kang Bise Presidente Sara Duterte.
Sa usa ka pahayag nga gipirmahan sa 167 ka mga pari ug obispo, gipasiugda sa grupo nga ang Senado obligado nga mosunod sa Konstitusyon ug ipadayon ang husay diha-diha dayon.
Gipasiugda usab nila nga ang bisan unsang paglangan sa pagdungog sa impeachment katumbas sa paglangan sa hustisya—dili lamang alang sa publiko apan alang usab sa bise presidente.
Nanawagan usab ang Caritas Philippines sa mga simbahan ug komunidad nga magpahigayon og dungan nga pagpatingog sa mga kampana matag udto ug alas 6 sa gabii, ingon man pagdagkot og kandila ug mga pag-ampo alang sa usa ka patas ug makiangayon nga trial.
Ingon man nga giawhag usab nila ang mga magtutuo nga mag-ampo alang sa mga senador, prosecution panel ug defense panel aron makakita og klaro, makahimo sa husto nga mga pagpili ug molihok sumala sa balaod ug kamatuoran.
Dugang pa sa grupo nga ang malinawong pag-organisa sa mga lungsuranon nahimong mas importante human sa mga panghitabo sa Senado sa miaging semana, aron mapanalipdan ang demokrasya ug pagkamay-tulubagon sa gobyerno.
