Gibutyag ni Atty. Rameses Villagonzalo, usa ka International Criminal Court accredited lawyer, nga kinahanglang masilbi una sa National Bureau of Investigation ang “warrant of arrest” nga gikan sa ICC batok kang Sen. Ronald “Bato” Dela Rosa, una moepekto ang Temporary of Restraining Order nga gipangayo ni Dela Rosa ngadto sa Korte Suprema.
Matud ni Atty. Villagonzalo, nga ang “issuing authority” sa mismong “warrant” batok kang Sen. Dela Rosa, anaa sa International Criminal Court og walay laing makapapas sa epekto kon dili ang ICC mismo gumikan sa mga posibleng mga balidong mga rason.
Lakip sa mga rason niini mao ang posibleng pagkasipyat sa korte o ang mga panghitabo nga kung aduna nay kaso nga gipasaka diri sulod sa Pilipinas, apan sapagkakaron wala pay mga rason nga makadepektibo sa mismong warrant sa ICC hinungdan nga magpabilin kining balido.
Gihimug-atan ni Villagonzalo, nga posibleng mahimong premature ang pagpangayu og TRO sa kampo ni Sen. Dela Rosa ngadto sa Korte Suprema, gumikan kay wala pa masilbi ang warrant og wala pa masikop si Dela Rosa sa mga sakop sa NBI.
Dugang niini, nga dili mamahimo nga mohatag og advisory opinion ang Korte Suprema ug bisan pa nga aduna kini gipagawas nga TRO dili gihapon kini makaapekto sa kaso nga crime against humanity sa ICC.
Sa hisgutanan usab sa pagpasaka og Senate resolution No. 44 nga nagtugot sa Senado nga ipaubos sa protective custody si Sen. Bato Dela Rosa, gibutyag ni Atty. Villagonzalo nga legal kini apan dili kini makaapekto sa pagpatuman sa pagsikop kang Dela Rosa ngadto sa mga awturidad.
Mamahimo usab nga mapasakaan sa sanga sa ehekutibo, enforcement unit o sa ICC ang mga senador og “obstruction of Justice” kung ugaling mobabag kini sa pag-aresto kang Sen. Bato Dela Rosa.
