Gituki sa Cebu City Council ang ordinansahon nga Guidlines on Responsible Pet Ownership and Humane Community Pet Care and Stray Animal Management sa nakalabayng session sa kagamhanan sa Sugbo.
Kini gumikan kay nag-atubang sa kakulang sa anti-rabies vaccine alang sa iro ang siyudad bisan pa sa gipadayong pagduso sa mas hugot nga palisiya sa responsible pet ownership ug stray animal management.
Gihisgutan sa Cebu City Council ang proposed ordinance nga “Guidelines on Responsible Pet Ownership and Humane Community Pet Care and Stray Animal Management.”
Sumala ni Councilor Pablo G. Labra II, tumong niini nga sulbaron ang nagkadaghang stray animals, animal bite incidents, dili husto nga paglabay sa hugaw sa binuhi, ug ubos nga vaccination rate.
Gipadayag ni Dr. Jessica O. Maribojoc sa DVMF nga 1,400 ra ka doses ang anaa karon sa Cebu City, layo sa 16,000 nga gikinahanglan para sa herd immunity.
Ang ordinansa nagdasig usab sa mga pet owner nga iparehistro ug i-microchip ang ilang binuhi. Ang lifetime registration uban sa microchipping nagkantidad og ₱600, samtang ₱200 sa regular registration.
Gitambagan usab ni Councilor Phillip Zafra ang DVMF nga mopalit dayon og dugang bakuna pinaagi sa supplemental budget imbis nga maghulat pa sa annual allocation.
