Nag-atubang karon og kasong kriminal ug administratibo sa Office of the Ombudsman si kanhi Budget Secretary Amenah Pangandaman tungod sa giingong ilegal nga pagbalhin sa binilyon ka pesos nga pundo sa gobyerno.
Ang reklamo gipasaka sa usa ka health advocate nga si Dr. Tony Leachon tungod sa mga kalapasan nga technical malversation ug graft.
Base sa sumbong, si Pangandaman angay nga seryosong manubag tungod sa iyang krusyal nga papel sa pag-apruba sa pagbalhin sa P60 bilyon gikan sa PhilHealth ug P107 bilyon gikan sa PDIC patungong National Treasury samtang siya pa ang kalihim sa DBM.
Sa pagkakaron, wala pa makahatag og opisyal nga pamahayag si Pangandaman bahin sa maong mga alegasyon.
Kahinumduman nga niadtong Disyembre sa miaging tuig, gideklarar sa Korte Suprema nga supak sa konstitusyon ang maong fund transfer mechanism ug gimandoan ang gobyerno nga ibalik ang maong pundo sa PhilHealth karong tuiga.
Una na usab nga gikiha ni Leachon sa susamang isyu si kanhi Finance Secretary Ralph Recto ug uban pang mga opisyal.
