Usa ka tawo ang namatay ug kapin sa 60 ang nasamdan human ang mga drone strike miigo sa Kuwait International Airport taliwala sa nagkataas nga tensyon tali sa Estados Unidos ug Iran.
Gihulagway sa Ministry of Defense sa Kuwait ang insidente isip “criminal Iranian aggression,” samtang ang foreign ministry miingon nga daghang diplomatic mission ang nadaot sa pag-atake.
Ang Islamic Revolutionary Guard Corps (IRGC) miingon nga kini ang nagpaluyo sa operasyon ug miingon nga kini panimalos sa bag-ohay lang nga aksyon sa US batok sa usa ka Iranian oil tanker ug Qeshm Island. Giinsistir usab sa Iran nga gitarget niini ang mga base sa US sa lainlaing mga bahin sa rehiyon sa Gulf.
Ang namatay gikumpirma nga usa ka Indian national, samtang ang foreign ministry sa India miingon nga daghang mga lungsuranon sa India ang nalakip usab sa mga nasamdan ug nanawagan alang sa diha-diha nga de-escalation.
Agig tubag, gimandoan sa Kuwait ang duha ka Iranian diplomats nga mobiya sa nasud sulod sa 24 oras ug gipatawag ang Iranian chargé d’affaires.
Sumala sa U.S. Central Command (CENTCOM), nagpahigayon usab sila og overnight strike sa Qeshm Island isip tubag sa ilang giingon nga giplano nga mga pag-atake sa Iran sa Middle East.
Miingon usab sila nga ilang na-intercept ang daghang mga drone ug missile sa Iran sa Kuwait, Bahrain, ug mga sibilyan nga ruta sa maritima.
Sa laing bahin, giinsistir sa Iran nga mibalos lang kini pinaagi sa mga missile ug drone strike batok sa mga base sa US ug mga operasyon sa helikopter sa usa ka wala nganli nga nasud sa rehiyon, ug giakusahan ang Kuwait ug Bahrain sa direktang pagpanghilabot.
