Nagtapok ang pipila ka mga grupo sa Duterte Diehard Supporters (DDS) sa Plaza Independencia sa Dakbayan sa Sugbo kagahapong adlawa, Huwebes, Hunyo 5, 2026 kini aron pagpadayag sa ilang suporta sa padayung pagpahigayon sa Senate Blue Ribbon maylabut na sa flood control scandal.
Nagpadayag ang mga partisipante sa ilang mga kabalaka bahin sa bag-o nga mga kalamboan sa Senado ug nanawagan alang sa accountability, transparency, ug fairness sa pagdumala sa mga isyu sa nasud.
Mibutyag ang Secretary General sa Cebu Alliance for Duterte nga si Jun Abines nga ang asembliya nagpakita sa mga sentimento sa mga tigpaluyo nga hugot nga nagbantay sa mga kalamboan sa higher office.
Sigon ni Abines, nga ang grupo nag-awhag sa mga magbabalaod nga sigurohon nga ang mga proseso sa Senado magpabilin nga patas ug naka-focus sa interes sa publiko, nga nagpasiugda nga ang mga kalahian sa politika dili angay makababag sa mandato sa konstitusyon sa Senado.
Dugang pa niini nga ang mga partisipante sa panagtapok nanawagan alang sa panaghiusa ug hustong proseso samtang ang mga importanteng isyu sa nasud padayung gidungog sa komitiba.
Samtang sa pikas bahin, si Moises Deiparaine, ang lider sa Duterte Riders, nagkanyon nga usa sa mga rason sa panagtapok sa mga DDS mao ang ilang pagsupak sa gibuhat nga lakang sa bag-ong mayoriya nga pag-ilis sa liderato sa senado.
Gitambongan ang panagtapok sa mga miyembro sa Maisog, Duterte Riders Team, Save the Philippines, Cebu Alliance for Duterte, The Muslim Community for Duterte, lakip usab nga mitambong si kanhi Cebu City Mayor Micheal Rama, uban sa ubang mga grupo nga nahiuyon sa DDS.
