Nanawagan og dinalian nga panagtagbo si Ukrainian President Volodymyr Zelenskiy ngadto kang Russian President Vladimir Putin pinaagi sa usa ka open letter aron pormal nga tapuson ang kapin sa upat ka tuig nga gubat.
Bisan pa niini, nagpasidaan ang Kyiv nga andam gihapon silang mopadayon sa pakig-away kon gikinahanglan.
Sumala sa opisina sa presidente, gipadala usab ang maong sulat ngadto sa ubang kanasoran lakip na ang Estados Unidos.
Sa maong pamahayag, gipunting ni Zelenskiy nga ang kadaghanan sa mga tawo sa Russia gikapoy na sa epekto sa gubat, sama sa inflation, kakulang sa gasolina, ug ang mga pag-atake sa missile ug drone sa Ukraine, hinungdan nga andam na usab sila alang sa kalinaw.
Gipahayag ni Zelenskiy nga tungod kay nakatutok karon ang Estados Unidos sa panagbangi niini sa Iran, sayop nga maghulat lang sila hangtod nga ang gubat sa Europa mobalik sa sentro sa atensyon sa kalibutan.
Matud sa lider sa Ukraine, ang dalan padulong sa kalinaw kinahanglang magsugod mismo sa frontline, diin kinahanglan molihok ang diplomasya.
Nanawagan usab ang Ukraine alang sa usa ka hingpit nga ceasefire sa tibuok gidugayon sa negosasyon, nga iyang giingon nga usa ka sumbanan nga pamaagi sa tibuok kalibutan.
Gisugyot ni Zelenskiy ang pagtakda og klarong petsa alang sa maong tigom, diin iyang gihisgutan ang mga nasod sama sa Switzerland, Turkey, ug pipila ka kanasoran sa Arab world nga tradisyonal nga nag-host sa mga lider sa kalibutan alang sa mga sabot alang sa kalinaw.
Nagpasidaan usab siya nga ang pagpadayon sa gubat mamahimong dakong hulga sa personal nga posisyon ug liderato ni Putin.
Didto sa Moscow, gipahayag sa Kremlin nga nakita na nila ang maong sulat ug hatagan na og briefing si Putin kalabot niini.
Samtang didto sa Amerika, nipadayag usab sa iyang suporta si Presidente Donald Trump niadtong Huwebes, diin iyang gipahayag nga usa ka maayong lakang kung magtagbo ang mga lider sa Ukraine ug Russia aron hisgutan ang hingpit nga pagtapos sa maong gubat.
