Nibalik sa iyang “bad boy” image si Senador Robin Padilla human gipahigayon ang advance screening sa iyang pelikulang “Bad Boy 3” sa usa ka mall sa Cubao, Quezon City niadtong Huwebes sa gabii pipila lang ka oras human sa kontrobersyal nga hearing sa Senate Blue Ribbon Committee.
Usa ka emosyonal nga Padilla ang misugat sa media sa iyang movie screening, diin giangkon niini nga mas malipayon siya sa kalibutan sa showbiz kaysa sa politika.
Gibutyag usab sa senador nga angayan nang ipasa ang titulong “Bad Boy of Philippine Movies” ngadto sa iyang pag-umangkon nga si Daniel Padilla, ug naglaum kini nga makatrabaho si Kaila Estrada sa mga umaabot nga proyekto.
Gidugang sa aktor-politiko nga nadugay ang paggama sa maong third installment tungod kay mas nag-focus siya sa pagsuporta sa administrasyon ni kanhi Presidente Rodrigo Duterte niadtong 2016 sa wala pa siya misulod sa senado.
Gisugat si Padilla sa iyang asawa nga si Mariel Rodriguez-Padilla sa screening area taliwala sa hugot nga suporta sa iyang mga fans.
