Naggahin ang gobyerno og gibana-bana nga P1.30 trilyon para sa pagpalambo sa sektor sa edukasyon karong tuiga.
Gipahibalo kini ni President Ferdinand R. Marcos Jr. sa iyang pakigpulong sa ika-3 nga Commencement Exercises sa West Visayas State University (WVSU) College of Law, diin iyang gipasiugda ang kamahinungdanon sa padayon nga pagpamuhunan sa edukasyon aron mapalig-on pa ang sistema sa hustisya ug ang kinatibuk-ang kalamboan sa nasud.
Atol sa maong okasyon, kauban si First Lady Louise Araneta-Marcos, gipangunahan sa Presidente ang inagurasyon sa bag-ong upat ka andana nga building sa WVSU College of Law.
Ang maong pasilidad adunay unom ka classrooms, usa ka review room, ug duha ka moot court nga nagserbisyo isip suporta sa pagpalambo sa mga umaabot nga abogado.
Sa miaging pahayag, gitaho usab sa Presidente nga ang nasudnong badyet para sa 2026 naggahin sa pinakadako nga pondo sa kasaysayan para sa edukasyon, nga mokabat sa ₱1.345 trilyon o 4.36 porsyento sa Gross Domestic Product (GDP).
Ang maong pondo igahin para sa pag-hire og dugang mga magtutudlo, learning recovery programs sa core subjects, school-based feeding programs, ug pagtukod sa dugang mga classroom sa tibuok nasud.
